IND vs SA Test: భారత్, సౌతాఫ్రికా (IND vs SA Test) మధ్య జరిగిన రెండు టెస్టుల సిరీస్ భారత క్రికెట్ చరిత్రలోనే అత్యంత బాధాకరమైన జ్ఞాపకాల్లో ఒకటిగా మారింది. ఈ సిరీస్ కేవలం ఓటమి మాత్రమే కాదు భారత అభిమానులను తీవ్రంగా నిరాశపరిచిన ఘోర పరాజయం. సౌతాఫ్రికా జట్టు భారత్ను 2-0తో క్లీన్ స్వీప్ చేసింది. ముఖ్యంగా గువాహటి టెస్ట్లో భారత జట్టు 408 పరుగుల తేడాతో ఓడిపోయింది. ఇది టెస్ట్ క్రికెట్లో పరుగుల పరంగా భారత్కు అత్యంత పెద్ద ఓటమిగా నమోదైంది.
గువాహటిలో అభిమానుల ఆగ్రహం కట్టలు తెంచుకుంది
ఈ భారీ ఓటమి తరువాత గువాహటి మైదానంలో వాతావరణం వేడెక్కింది. సోషల్ మీడియాలో వైరల్ అవుతున్న ఒక వీడియోలో స్టాండ్స్లోని ప్రేక్షకులు భారత హెడ్ కోచ్ గౌతమ్ గంభీర్కు వ్యతిరేకంగా “హాయ్-హాయ్” అంటూ నినాదాలు చేయడం కనిపించింది. టీమ్ ఇండియా ఆటగాళ్లు, కోచింగ్ సిబ్బంది కూడా మైదానంలోనే ఉండటంతో పరిస్థితి మరింత ఇబ్బందికరంగా మారింది.
సిరాజ్ అందరి మనసు గెలుచుకున్నాడు
అదే సమయంలో ఫాస్ట్ బౌలర్ మహమ్మద్ సిరాజ్ ఒక అద్భుతమైన చర్యతో అందరి హృదయాలను గెలుచుకున్నాడు. సిరాజ్ అభిమానుల వైపు చూస్తూ తన నోటిపై వేలు ఉంచి నిశ్శబ్దంగా ఉండమని సంజ్ఞ చేశాడు. ఆయన చేసిన ఈ సంజ్ఞ తన హెడ్ కోచ్కి అండగా నిలబడుతున్నాడని స్పష్టంగా తెలియజేసింది. ఈ వీడియో ఇంటర్నెట్లో వేగంగా వైరల్ అవుతోంది. సిరాజ్కి అన్ని వైపుల నుంచి ప్రశంసలు దక్కుతున్నాయి.
గౌతమ్ గంభీర్ పదవీకాలంపై ప్రశ్నలు
గౌతమ్ గంభీర్ హెడ్ కోచ్ అయిన తర్వాత టీమ్ ఇండియా టెస్ట్ రికార్డు అంత బలంగా లేదు. ఇప్పటివరకు గంభీర్ కోచింగ్లో భారత్ 19 టెస్ట్ మ్యాచ్లు ఆడింది. ఇందులో 7 గెలిచింది,.10 ఓడింది. 2 డ్రా అయ్యాయి. వరుస ఓటముల నేపథ్యంలో జట్టుకు కొత్త వ్యూహాలు, బలమైన ప్రణాళిక అవసరమని విమర్శకులు అంటున్నారు. సౌతాఫ్రికాపై ఎదురైన ఘోర పరాజయం తరువాత గంభీర్ పదవీకాలంపై ప్రశ్నలు తలెత్తుతున్నాయి. ముఖ్యంగా స్వదేశంలో క్లీన్ స్వీప్ అవ్వడం భారత అభిమానులకు అస్సలు ఆమోదయోగ్యం కాలేదు.
ముందు ఏముంది?
టీమ్ ఇండియా తన తదుపరి టెస్ట్ సిరీస్ను 2026లో శ్రీలంకతో ఆడనుంది. అంతకుముందు జట్టు యాజమాన్యం తమ లోపాలను గుర్తించాల్సి ఉంటుంది. అది బ్యాటింగ్ వైఫల్యమైనా, బౌలింగ్లో పదును లేకపోవడమైనా లేదా జట్టు కూర్పు విషయంలోనైనా తక్షణమే మార్పులు చేయాల్సిన అవసరం ఉంది.